انطلق منذ قليل الموتمر الصحفي الخاص بفيلم الفستان الأبيض المشارك ضمن فعاليات الدورة السابعة من مهرجان الجونة السينمائي بحضور كل من ياسمين رئيس وأسماء جلال والمتتج محمد حفظي والمخرجة جيلان عوف.

وخلال المؤتمر الصحفي، وجه سؤال إلى ياسمين رئيس عن مدى التشابهة بين شخصيتها في فتاة المصنع وفيلم الفستان الأبيض، لترد رئيس: «الربط ما بين شخصية وردة في الفستان الأبيض وهيام في فتاة المصنع حاجة حلوة إن وردة بتفكركم بشخصية هيام وهي من أكتر الشخصيات القريبة لقلبي بس هما مش شكل بعض ولا نفس المستوى الاجتماعي، وردة المفروض من طبقة تحت المتوسطة متعلمة واحنا عندنا مشكلة أننا بنصنف الناس شعبي وراقي مفيش حاجة اسمها كدا».

توثيق المشاهد الاجتماعية من خلال الفن

وتابعت ياسمين رئيس خلال الندوة بالجونة، «اهتمام مخرجة العمل جيلان أنها توثق المدينة دا مبشوفوش غير مع مخرجين كبار، التوثيق دا حلو بيعيش زي مثلا مشهد الناس وهي بتصلي العيد هتعرف تفرق المشهد عن مشاهد تانية، أنا بحب الحاجات دي وبقدرها».

اتجاه ياسمين رئيس إلى الإنتاج

أما عن مشاركتها في إنتاج الفيلم، أوضحت: «لما عدى عليا وقت في شغلي فهمت أكتر إن وجودي كممثلة مش بس معتمد على موهبتي، في حاجات تانية كجزء تجاري بنشتغل عليها وأنا في حاجات عايزة أعملها».

وتابعت: «الطريقة الطبيعية إني أعملها وأكون جزء منها، وأنت لما تكبر مثلا بتبقي طالب مبلغ معين ممكن المنتج ميجيبكش عشان مش قادر يدفعلك، وأنت الورق عجبك وعايز تعمله مثلا»، وهنا تدخل المنتج محمد حفظي في الحديث، وكشف قائلا: «ياسمين رئيس هتعمل شركة إنتاج وهتنتج أفلام بالكامل».